Ang pag-aaral na ito ay isang quasi-eksperimental na pananaliksik na gumamit ng disenyong pretest-posttest control group. Layunin nitong tiyakin ang bisa ng paggamit ng Visible Thinking Routine sa paglinang ng kasanayan sa pag-unawa sa binasa ng mga mag-aaral sa ikawalong baitang, taong panuruan 2020-2021 ng isang pribadong paaralan sa Lungsod ng Iloilo. Ginamit sa pagsukat ng antas ng kasanayan sa pag unawa ng mga mag-aaral ang pretest at posttest na sumailalim sa balidasyon at pilot testing. Kasama sa mga kasanayang nilinang ang pagtukoy o pagkilala ng mga detalye, pagpapakahulugan (kontekstwal, denotatibo at konotatibo), pagsusuri ng damdamin at tonong ipinahihiwatig, pagsusuri at paghihinuha ng kaisipan, pag-uugnay at pagpapahalaga ng mga kaisipang nakuha. Para sa pang-istadistikang pagsusuri ng mga datos, ginamit ang mean, standard deviation, t-test for independent samples, paired t test, Shapiro-Wilk test, Wilcoxon signed rank test at Mann-Whitney U test. Ang antas ng kabuluhan ay itinakda sa .05 alpha. Batay sa resulta ng katampatang tuos, ipinakikita na Developing ang antas ng kasanayan sa pag-unawa sa binasa ng mga mag-aaral bago gamitin ang tradisyunal at Visible Thinking Routine sa pagtuturo ng panitikan at naging Proficient ang antas sa pag-unawa sa binasa ng mga mag-aaral pagkatapos gamitin ang tradisyunal at Visible Thinking Routine sa pagtuturo ng panitikan. Sa imperensyal na pagtalakay ng mga datos, walang makabuluhang pagkakaiba sa antas ng kasanayan sa pag-unawa sa binasa ng dalawang pangkat bago gamitin ang tradisyunal at Visible Thinking Routine sa pagtuturo. Lumabas din na walang makabuluhang pagkakaiba sa antas ng kasanayan sa pag-unawa sa binasa ng dalawang pangkat pagkatapos gamitin ang tradisyunal at Visible Thinking Routine. Samantala, may makabuluhang pagkakaiba ang antas ng kasanayan sa pag-unawa bago at pagkatapos gamitin ang Visible Thinking Routine sa pagtuturo at may makabuluhang pagkakaiba din ang antas ng kasanayan sa pag-unawa sa binasa bago at pagkatapos gamitin ang tradisyunal na pagtuturo sa panitikan. Samantala, makabuluhang pagkakaiba sa mean gain scores ng antas ng kasanayan sa pag-unawa sa binasa bago at pagkatapos gamitin ang tradisyunal at Visible Thinking Routine sa pagtuturo.

Panes-Arenga, M. J. B. (2021). "Visible thinking routine" sa pagtuturo ng panitikan: pagtiyak sa antas ng kasanayan sa pag-unawa sa binasa [Master's thesis, West Visayas State University]. WVSU Institutional Repository and Electronic Dissertations and Theses PLUS.